Ginsapubliko ni United States Secretary of War Pete Hegseth ang pagdugang sang pondo para sa security cooperation sang U.S. Department of War agud mapadasig ang modernisasyon sang Armed Forces of the Philippines (AFP).
Gin-anunsyo ini kadungan sang meeting ni Hegseth kay Defense Secretary Gilberto Teodoro Jr. kun sa diin naistoryahan ang progreso sang kooperasyon sa seguridad, modernisasyon sang alyansa, kag mga tikang sa pagpalig-on sang depensa sang duha ka pungsod.
Suno sa U.S. Department of War, ang dugang nga pondo nagatuyo man sa pagpauswag sang interoperability sang mga pwersa sa First Island Chain.
Wala ginbutang sang ahensya ukon ni Hegseth kun pila ang eksakto nga kantidad sang dugang nga pondo.
Sa meeting sang duha ka opisyal, nakasugtan man ang pagsugod sang alliance command and control modernization sprint agud mapauswag ang real-time coordination kag mapalig-on ang pag-atubang sa mga pagpanghangkat sa alyansa.
Gin-abi-abi man nanday Hegseth kag Teodoro ang pagsanyog sa pag-operate sang mga site sa idalom sang Enhanced Defense Cooperation Agreement ukon EDCA, lakip ang investments sa mga importante nga imprastraktura kag pasilidad para sa pagtipig sang mga kagamitan sa depensa sa Pilipinas.
Nahibaluan nga ang Pilipinas amo ang host sang ika-20 nga ASEAN Defense Ministers’ Meeting ukon ADMM kag ika-13 nga ADMM-Plus nga ginahiwat sa Cebu subong nga Oktubre 28 kag 29.
Suno sa Department of National Defense, ang ADMM amo ang pinakataas nga mekanismo sang ASEAN para sa konsultasyon kag kooperasyon sa defense, samtang ang ADMM-Plus nagalakip sang walo ka dialogue partners, lakip ang Australia, China, India, Japan, New Zealand, South Korea, Russia kag United States.#
