Nagpaandam ang Philippine Army 10th Infantry Division (10ID) sa publiko kasunod sang nagalapta nga AI-generated image sa social media.
May kaangtanan ini sa laragway nga nagapakita sang ila suporta kay Senator Bato Dela Rosa nga padayun pa subong nga ginapangita sang mga awtoridad bangud sa arrest warrant halin sa International Criminal Court.
Suno sa 10ID, importante nga hibaluon sang publiko kun matuod ang isa ka detalye pinaagi sa paglantaw sa mga reliable ukon masaligan nga mga sources ilabi na nga nagahatag ini sang impression nga may ginadampigan nga politiko ang mga soldado.
Nahibaluan nga ginakabig sang ICC nga co-perpetrator ni former President Rodrigo Duterte si Senator Bato sa gina-alegar crimes against humanity sa idalom sang war on drugs sang si Duterte pa ang nagapungko nga alkalde sang Davao City kag Presidente sang Pilipinas.
Nag-expire na kahapon, Oktubre 30, ang isa ka semana nga ultimatum nga ginhatag sang Philippine National Police agud nga magsungka si Dela Rosa.
Bangud sini, gin-mobilize ang dedicated tracker teams sa tanan nga 18 police regional offices sa bilog nga pungsod agud makit-an ang pugante nga senador.
