Duwa ka babaye, halos duwa ka dekada naman sa ila propesyon bilang embalsamador; fulfillment kag kahulugan, ila nakit-an sa sini nga trabaho
Sa isa ka propesyon nga masami nga ginaangot sa kamatayon kag kalisod, duwa ka babae ang nakakita sang fulfillment kag kahulugan sa ila nga trabaho bilang mga embalsamador.
Ini amo sanday Maribelle Sarate kag Ardee Porras nga halos duwa ka dekada na nga nagatrabaho sa patag sang embalming, isa ka propesyon nga nagakinahanglan indi lamang sang ihibalo kag pagka-eksperto kundi mangin sang malawig nga pasensya, kabakod kag pag-ulikid.
Sa pihak sang indi kinaandan nga pagtilaw sang ila nga trabaho, padayon nila nga ginatungdan ang ila nga papel agud mabuligan ang mga pamilya nga mahanda sang maayo ang ila mga napatay nga pinalangga sa kabuhi bag-o dal-on sa ila ulihi nga palahuwayan.
Para sa ila, labaw pa sa pagpanghanda sa mga bangkay ang ila nga trabaho bangud kabahin man ini sang pagbulig sa mga pamilya nga nagaeksperyensiya sang tuman nga kalisod.
Gin-ako man nila nga indi man malikawan ang mga pagpanghangkat sa ila nga propesyon, kalakip ang pag-atubang mga nagkalain-lain nga kondisyon sang mga patay, malawig nga oras sang pagtrabaho kag emosyonal nga kabug-at sang kada sitwasyon.
Sa pihak sini, sa pagligad sang panahon, natun-an nila nga atubangon ang ila nga trabaho sang may propesyonalismo, respeto kag kabalaka agud mahatagan sang disente nga haya kag lubong ang isa ka patay.
Suno kanday Sarate kag Porras, sila ang pamatuod nga bisan sa isa ka propesyon nga indi ordinaryo nga ginahandom ukon ginapili sang kadamuan, mahimo sa gihapon makit-an ang matuod nga fulfillment paagi sa serbisyo, dedikasyon kag pagpalangga sa trabaho.
