Gin-ako sang Punong Barangay sang San Roque, Jaro nga ulihi na niya nahibaluan ang insidente sang paglapas sang pila ka indibidwal sa Iloilo City Regulation Ordinance No. 2011-786 nga nagadumili sa pag-inom sang makahulubog nga ilimnon sa mga pampublikong lugar kag eskinita, kun sa diin gin-alegar nga nagtambong si City Councilor Jose Maria “Nene” Dela Llana.
Sa interview sang Bombo Radyo kay Punong Barangay Carlos Asis sang Brgy. San Roque, Jaro, iya ginpahayag nga sang Domingo na sang iya nahibaluan ini apisar natabo ang ginpahayag pag-inom sang amo nga mga indibidwal sang nagligad pa nga Biyernes, Oktubre 30.
Sandig sa ginsaysay sang mga opisyales sang barangay, naghingyo ang mga indibidwal nga tugutan sila nga ubuson na lamang ang ila nabilin nga botilya sang ilimnon, apang wala ini natuman bangud naglab-ot sila hasta sang kaagahon.
Gin-athag man sang mga opisyales nga nag-una na nga nagpauli si Dela Llana kag wala na nagpartisipar pagkatapos sini.
Sa karon, ginpanginwala naman sang konsehal ang mga alegasyon batok sa iya kag ginpahayag nga isa lang ini ka political move.
Kasunod sini, ginmanduan sang punong barangay ang ila Chairman sang Committee on Peace and Order nga maghimo sang nagakaigo nga tikang angot sa insidente.
Suno kay Asis, madugay na nila nga ginapahibalo ang mga pumuluyo tuhoy sa nasambit nga ordinansa paagi sa pagpaslak sang mga kopya sini sa mga lugar nga kalabanan venue sang imnanay.
