Otomatiko nga ma-suspend ang klase sa mga eskwelahan sa siyudad sang Iloilo kun maglab-ot sa 42 degrees Celsius ang heat index.
Sa interview sang Bombo Radyo kay Atty. Russel Tabang, Legal Officer sang Schools Division of Iloilo City, ginpaambit niya nga amo ini ang ginasunod nga guidelines para sa suspension sang klase sa tunga sang mga natural disasters ukon climate change.
Ginklaro ni Atty. Tabang nga kun 27 degrees Celsius ang heat index, padayon sa gihapon ang klase, apang kun maglab-ot ini sa 27-32 degrees Celsius, makonsiderar na ini nga dapat mag-shift sa hybrid classes kun sa diin nalakip ang face-to-face, online, ukon modular.
Sa 33-41 degrees Celsius naman, otomatiko nga suspended ang face-to-face classes apang magapadayon ang klase paagi sa alternative learning nga amo ang modular kag online.
Dugang pa niya, kun maglab-ot sang 42 degrees Celsius paibabaw, ini na ang tion nga otomatiko nga i-suspend ang klase sa bug-os nga siyudad halin Elementary tubtob Senior Highschool.
Nahibaluan nga subong nga adlaw, ginpaguwa ang bag-o nga executive order ni President Ferdinand Marcos Jr. nga nagapatuman sang bag-o nga mga patakaran sa pagsuspende kag pagbalik sang klase kag onsite work sa mga pampubliko kag pribado nga eskwelahan.
Sa sini nga order, gin-introduce ang tatlo ka mga mekanismo nga amo ang automatic suspensions sandig sa official hazard warnings kag technical thresholds, localized suspensions nga gindeklarar sang local chief executives, kag ang school-level suspensions sandig sa documented safety assessments.
Sa bag-o nga pagsulundan, mahimo nga ipatuman ang class suspensions sang awtomatiko nga wala sang separado nga announcement halin sa local officials pananglitan malab-ot na sang hazard warnings ang thresholds nga amo ang iga-establisar sa implementing guidelines.
Samtang, sa amo nga order, mahimo man nga magpangabay ang mga eskwelahan nga ibalik ang face-to-face classes bisan may yara pa sang nagapadayon nga suspensyon sa ila lugar.
Ginhatagan ang Department of Education (DepEd) sang 30 ka adlaw agud nga magpagwa sang implementing guidelines kasunod sang mandu halin sa Malacañang.
