Tinuig na nga problema sa iban nga pumuluyo sang Brgy. San Roque, Jaro, Iloilo City ang gahod nga tuga sang mga masami nga naga-inum-inom sang kilid sang dalan nga nagadisturbo na sa iban tubtub sa kaagahon.
Sa interview sang Bombo Radyo kay Alias Joe, isa sa mga residente sang amo nga barangay, iya ginpahayag nga pila ka beses naman sila nga nagpalab-ot sang reklamo sang barangay, apang gindugang sini nga wala man sang nangin lihok.
Suno sa iya, kun kaisa, nagalab-ot pa sa aga ang drinking session.
Ini ang rason suno sa iya nga ang iya tiya nagsaylo na lang sa lain nga lugar, kag ginbilin na lang ang iya balay agud nga arkilahan.
Suno kay Alias Joe, posible nga nahadlok lang ang iban nga boarders nga magreklamo bangud nga pangayaw sila sa lugar.
Ginpahayag sini nga pila ka beses na sini nakit-an nga may konsehal nga naga-upod sa pag-inom.
Wala ini sang ginmensyonar nga pangalan apang ang latest nga reklamo sa San Roque, Jaro nagaalegar nga nag-upod si Councilor Nene Dela Llana sa mga naga-inom kag magahod nga naga-istorya sang Oktubre 30 ukon Byernes sang gab-i.
Ang ginatumod sang tag-reklamo nga layi amo ang ginsulit-sulit sang Department of the Interior and Local Government (DILG) sa temprano nga bahin subong nga tuig nga istrikto nga ginadumilian ang pag-inom-inom sa kilid sang dalan.
Sandig anay kay DILG Secretary Jonvic Remulla, indi mahimo magplastar sang mga lamesa kag bangko sa higad sang dalan kag mag-inom-inom bangud amo ini ang ginahalinan sang mga ginamo kag mangin sang sexual harassment cases.#
