Ginalauman nga magapadayon subong nga adlaw Nobyembre 5 tubtob buwas nga adlaw Nobyembre 6 ang delikado nga heat index sa pila ka bahin sang Iloilo nga may posibilidad nga magalab-ot sa 43 degrees Celsius.
Base sa forecast sang Philippine Atmospheric, Geophysical and Astronomical Services Administration (PAGASA) magapabilin sa 42 degrees Celsius ang heat index sa Iloilo City subong nga Huwebes kag Byernes, samtang may posibilidad nga maglab-ot sa 43 degrees Celsius sa banwa sang Dumangas buwas nga adlaw sang Biyernes.
Nahibaluan nga kahapon nga adlaw, parehos nga naka-record sang 42 degrees Celsius nga heat index ang mga nasambit nga lugar.
Suno sa PAGASA, lakip sa danger category ang heat index nga 42 tubtob 51 degrees Celsius, kun sa diin possible nga maka-eksperyensya sang heat cramps kag heat exhaustion, samtang nagataas naman ang peligro sa heat stroke.
Gina-abisuhan ang publiko, particular na ang mga nagatrabaho sa gwa, kaangay sang mga estudyante, commuters, bata kag tigulang nga likawan ang madugay nga pagtinir sa init, mag-inom sang tubig kag maghalong sa heat-related illnesses.
