Nagapanawagan ang Iloilo Provincial Health Office sa mga local government units (LGUs), health facilities, kag iban pa nga mga primary care providers nga pasangkaron ang ila public health preparedness kag response measures, bilang kabahin sa preparasyon sa posible nga epekto sang El Niño.
Sa interview sang Bombo Radyo kay Dr. Rodney Labis, Chief sang Health Service Delivery Division sang Iloilo Provincial Health Office, iya ginpahayag nga importante nga mapreparahan ang pag-atender sa mga pasyente nga apektado ang ikaayong lawas bangud sa tuman nga kainit.
Lakip sa mga pangabay niya ang pag-update sa mga local health emergency response plans, pagsiguro sa kun ano ka handa ang mga medical responders sa pag-responde sa tion sang health emergencies, paghibalo sa readiness sang primary care facilities kaangay sang YAKAP accredited facilities, kag pagprotekta sa mga health workers.
Dugang pa ni Labis, luyag man niya nga mahatagan sang atensyon ang mga kabataan, nagabusong, tigulang, kag mga indibidwal nga nagabatyag sang chronic medical conditions, paagi sa padayon nga pag-provide sang health services angot sa ila kondisyon.
Magahatag naman ang IPHO sang augmentation kag technical assitance, kaupod ang ila mga partner agencies, agud mapabakod ang mga local health systems.
Ginapahanumdom man niya sa mga health facilities nga mangin handa sa posible nga mga health hazards bangud suno sa iya, bisan may ara sang El Niño, posible sa gihapon ang mabaskog nga ulan kag pagbaha.
