Ginpasidunggan sang Police Regional Office 6 (PRO-6) ang siyam ka Local Government Unit (LGU) sa 3rd District sang Iloilo bangud sa ila suporta sa Project RTT 3389, matapos makompleto sang tanan nga 427 ka barangay sa distrito ang ginapatuman nga kampanya batok sa loose firearms.
Ginhiwat ang pasidungog sa Maasin Covered Gym subong nga Huwebes, Nobyembre 5, sa pagpanguna ni PRO-6 Regional Director Police Brigadier General Randulf Tuaño.
Mahibaluan nga ang Project RTT 3389 ukon Restrict, Track and Turn-In isa ini ka kampanya sang PRO-6 nga nagatuyo nga marekober ang mga armas-luthang nga wala sang nagakaigo nga dokumento, agud makabulig sa pagpanubo sang krimen diri sa Western Visayas.
Base sa datos, nakarekober ang siyam ka banwa sa distrito sang kabug-usan nga 450 ka loose firearms halin sa 427 ka barangay.
Ang mga banwa nga una nga nakakumpleto sa programa, amo ang Bingawan, Mina kag Badiangan, ginsundan sang Lambunao, Janiuay, Calinog, Maasin, Pototan kag Cabatuan.
Bangud sa ila pagsuporta sa kampanya, ginhatagan sang plaque of recognition ang siyam ka mga alkalde sang mga banwa, certificate of commendation sa 427 ka punong barangay, kag medalya sang papuri sa mga hepe sang tagsa ka police station.
By: Bombo Glenette Delit
