Indi na magpasilabot ang Malacañang sa kontrobersiya may kaangtanan sa ginapahayag pag-angkon sang personal staff ni anay House Speaker Martin Romualdez samtang nakapreso subong sa New Quezon City Jail.
Suno kay Palace Press Officer Claire Castro, kinahanglan anay nga mahibaluan ang matuod nga sitwasyon kag rason kun ngaa kinahanglan nga may ara sang staff si Romualdez, lakip ang posible nga 24-hour assistance.
Pahayag pa ni Castro, kun mapatud-an nga may ara sang special treatment, indi dapat mangin normal ini nga aktwasyon ukon indi dapat pagtugutan sa sulod sang presuhan.
Nagapanawagan man ini sang madalom nga imbestigasyon kag likawan anay ang paghatag sang alegasyon samtang wala pa makumpleto ang impormasyon.
Samtang, gindayaw naman ni Castro ang columnist nga si Ramon Tulfo sa pag-ako sini kag pagpangayo sang pasaylo matapos bawion sini ang nauna sini nga pahayag nga nakagwa sa presuhan si Romualdez.
