Ginpatpat ni Pangasinan 2nd District Representative Mark Cojuangco kag Chairperson sang Special Committee on Nuclear Energy, Philippine House of Representatives, nga ang pagsalig sang Pilipinas sa imported nga fossil fuel ang isa sa mga nagapanguna nga rason kon ngaa mataas ang presyo sang kuryente sa pungsod.
Sa interview sang Bombo Radyo kay Congressman Cojuangco, iya ginpahayag nga ginakabig nga fossil fuel-poor ang Pilipinas kag wala sang bastante nga lokal nga coal nga mahimo gamiton sa power generation rason nga nagagasto ang pungsod sang bilyon-bilyon nga dolyar kada tuig sa pag-import sang coal, partikular halin sa Indonesia.
Ginpakigbahin man niya nga ginalantaw nga manug-ubos na ang natural gas nga halin sa Malampaya Gas Field, gani kinahanglan na mag-import ang Pilipinas sang liquefied natural gas ukon LNG.
Apang, pahayag sang kongresista, mas mahal ang LNG ikumparar sa coal, nga mahimo magresulta sa generating cost nga masobra P20 kada kilowatt-hour kon madugangan pa gid sang iban pa nga gastos.
Bangud sini, ginpabug-atan ni Congressman Cojuangco nga mas barato ang nuclear fuel, kun sa diin suno sa iya, nagabalor lamang ini sang lima ka porsyento sang coal.
Ginpunto niya nga daku ang matipid sang Pilipinas kon magsaylo ini sa paggamit sang nuclear energy.
Dugang pa, ginapanawagan ni Congressman Cojuangco ang pagtukod sang dugang nga nuclear power plants sa Pilipinas agud masiguro ang mas barato nga kuryente sa malawig nga panahon kag mabuhinan ang pagsalig sang pungsod sa imported nga fuel.
