Nagpanawagan ang Diocese of Borongan sa mga Katoliko nga Pilipino nga pamatukan ang makahalalit nga pagmina kag amligan ang mga mangroves.
Ini ang kabahin sang mensahe sang diocese bilang pagdumdom subong nga adlaw sa ika-13 nga anibersaryo sang paglaslas sang Super Typhoon Yolanda sa Eastern Visayas.
Sa iya mensahe, ginpahayag ni Father Jan Michael Gadicho, diocesan administrator sang Borongan, nga dapat magbinuligay ang tanan sa pagtanom kag pag-amlig sang mga kahoy kag mangroves, pagbuhin sang basura, kag pagpreparar sang mga pamilya kag simbahan sa tion sang mga kalamidad.
Dugang pa sini, dapat suportahan ang mga yara sa mas delikado nga sitwasyon kag ipabati ang tingog sang publiko agud mapatuman ang matarong kag responsable nga mga polisa.
“Yolanda asks something of us today, in the midst of an environmental emergency that grows more urgent each year. The Church gives us a way to respond: see, judge, and act,” suno sa mensahe ni Gadicho.
Ginpanawagan man niya sa mga Katoliko nga dumdumon ang epekto sang Yolanda indi paagi sa kahadlok kundi paagi sa paglaum, kaalam, kag liwat nga pagpaninguha nga magbulig sa isigkatawo.
Suno kay Gadicho, dapat nga buksan ang mata sa mga pag-antos pareho sang pagkaguba sang mga isla bangud sa pagmina, mas mabaskog nga mga bagyo, pagsaka sang lebel sang dagat, pagkaguba sang mga baybayon kag pagkadula sang palangabuhian sang mga pumuluyo.
Gin-athag man niya nga ang dunang-manggad regalo sang Diyos nga gintugyan sa tawo agud amligan kag indi pag-abusuhon para sa personal nga kaayuhan.
“The earth is a gift entrusted to us by the Creator, not a possession to be exploited,” suno pa sa diocese.
Nahibaluan nga ang Super Typhoon Yolanda amo ang ginakabig nga pinakamakamamatay nga bagyo nga nag-igu sa Pilipinas.
Ini ang nag-landfall sang Nobyembre 8, 2013 kag nagbilin sang 7,350 ka mga patay kag missing.
Lakip sa mga rason nga nagresulta sa madamo nga casualties amo ang mabaskog nga hangin nga naglab-ot sa masobra 305 kilometro kada oras, mga lugar nga manubo ang elevation, kulang nga mga paandam, tuman nga kapigaduhon, kag kapaslawan sa pag-evacuate sang mga residente.#
