Naglab-ot na sa ₱465.7 million ang damage sa sektor sang agrikultura sa Western Visayas bangud sa El Niño phenomenon nga nagapadayon nga naga-apekto sa mga mangunguma kag fisherfolk.
Sa interview sang Bombo Radyo kay Office of Civil Defense Region 6 Director Raul Fernandez, iya ginpahayag nga naglab-ot na sa 4,559 ka pamilya ukon 22,795 ka indibidwal ang apektado sang El Niño sa nagkalain-lain nga local government units sa rehiyon.
Sa nasambit nga numero, 7,760 ang apektado nga farmers kag fisherfolk, samtang kalabanan sa damage sa agrikultura naghalin sa rice kag corn crops.
Pinakaapektado ang probinsya sang Capiz nga may yara sang ₱307 million nga damage, ginasundan sang Iloilo nga naglab-ot sa ₱155 million.
Suno kay Fernandez, ang lihuk sang gobyerno ang ginalakipan sang lima ka key sectors, amo ang food security, water security, health security, energy security kag public safety.
Pahayag niya, sa subong, ginagamit sang mga ahensya ang ila existing funds kag available allocations para ma-address ang epekto sang El Niño bangud nga wala pa sang final consolidated budget para sa phenomenon response measures.
Ginpahayag pa sang direktor nga magapatigayon liwat ang OCD VI sang meeting sa November 20 agud mabusisi ang mga kakulangan sa resources kag ang kinahanglan pa nga interventions sa pag-atubang sang padayon nga epekto sang El Niño sa rehiyon.
Panawagan ni Fernandez sa mga pumuluyo nga magtipid sang tubig, pagkay-o sang mga water leaks sa ila panimalay kag mag-reuse sang tubig kon mahimo, bangud madamo gihapon nga lugar sa Western Visayas ang naga-eksperyensya sang kakulang sa suplay sang tubig.
