Nagsabat si House Prosecution Panel Member kag Representative Terry Ridon nga indi dapat maghibi ang kampo ni Vice President Sara Duterte sa mga pamangkot sa una nga testigo sang defense team parte sa mga biyahe sini sa China.
Ini ang reaksyon ni Ridon matapos nga ginkwestyon sang spokesperson ni Duterte nga si Atty. Salvador Paolo Panelo Jr. ang sunod-sunod nga pagpamangkot kay Engineer Jamie Adalin kaangot sa ila “group tour” sa China.
Gintawag ini ni Panelo nga “unfair, improper kag irrelevant.”
Nag-ugat ang isyu matapos nga ginpamangkot ni House Private Prosecutor Atty. Benjamin Jay Tolosa Jr. si Adalin kahapon parte sa iya mga pagbiyahe sa nasambit nga pungsod nga ginapahayag nga all-expense-paid kag sponsored sang Chinese consulate.
Bangud nagapanindugan si Adalin nga indi na niya madumduman ang mga petsa kag lugar nga iya ginkadtuan, amo ini ang nangin sentro sang halos tanan nga interjections sang mga senator-judge sang nagbalik na ang session sa hapon.
Sabat naman ni Ridon, may kinamatarong ang prosecution team nga maggamit sang cross-examination agud nga takson ang kredibilidad sang testigo kag mahibaluan kun nagasugid ini sang kamatuoran, bangud mahibaluan man diri kun mapatihan bala ini sa iya ipanghambal may kaangtanan sa impeachment case.
“Kredibilidad ho ng witness yun eh, kung nagsasabi ba siya ng totoo,” suno kay Ridon. “Nasa kapangyarihan po ng nag-co-cross examine po yun para ma-test ang kredibilidad.”
“Huwag silang mag-iyak-iyak na tinanong siya tungkol po diyan sa mga bagay na yan,” suno pa kay Ridon.
Dugang pa niya, kun ang defense man ang nagpamangkot sang pareho nga mga pamangkot sa ila mga testigo sang una, ila man ini nga pagatugutan.
Gin-akusaran pa ni Ridon si Adalin nga daw ginatunto sini ang mga senator-judge matapos nga ginpaandaman ini kaina ni Senator Erwin Tulfo nga posible ini ma-contempt kag ginsaway man ni Senator-Judge Risa Hontiveros bangud sa pagkadlaw bisan nga indi man nagakaangay nga kadlawan ang mga pamangkot nga ginapamangkot sa impeachment court.
Bwas, Nobyembre 10, maga-testigo si Atty. Suzette Balucanag-Punay, corporate counsel sang GenCorp Industries Inc., matapos nga nag-request ini nga magpaiway subong nga adlaw bangud magapaidalum ini sa magnetic resonance imaging (MRI).
Nahibaluan nga kapin sa 20 ka testigo ang ginhingyo sang defense team nga ipatawag paagi sa subpoena halin Lunes tubtob Biyernes sini nga semana.#
