Indi magresulta sang lapnagon nga mga protesta ang posible nga pagka-convict kay Vice President Sara Duterte, suno kay Bicol Saro Representative Terry Ridon.
Suno kay Ridon, isa sa mga prosecutor sa impeachment trial ni Duterte, mas posible nga ipahayag sang iya mga supporter ang ila indi pag-ugyon paagi sa social media sa baylo nga magpatigayon sang dalagkuan nga mga protesta sa nagkalain-lain nga bahin sang pungsod.
Nahibaluan nga base sa isa ka survey nga ginpagwa sang nagligad nga bulan, 51% sang mga Pilipino ang nagapati nga dapat batunon ang mangin desisyon sang Senate Impeachment Court sa mangin resulta sang impeachment trial sini.
Bangud sini, ginpahayag ni Ridon nga posible nga kulang ang suporta sang publiko sa bisan ano nga protesta kon mapamatud-an nga guilty ang bise presidente.
Sa subong nga adlaw sang Lunes, magapadayon ang impeachment trial ni Duterte.
Ginalauman nga magapresentar ang iya defense team sang mga ebidensiya agud sabton kag pamatukan ang mga akusasyon sang prosekusyon nga may ara ini sang unexplained wealth.
Samtang nagapadayon ang kaso, mangin importante ang mga ebidensiya nga ipresentar sang duha ka kampo antes magpagwa ang Senado sang pinal nga desisyon.
