Padayon nga ginapasangkad sang Department of Education (DepEd) Region 6 ang pag-monitor sang mga bullying cases sa mga eskwelaahan.
Sa interview sang Bombo Radyo kay Mr. Hernani Escullar Jr., spokesperson sang DepEd Region 6, iya ginpahayag nga may yara sila sang narekord nga 399 ka kaso sa bulan sang Hunyo, kag 966 naman ka kaso sa kabug-usan sang sini nga tuig.
Suno kay Escullar, padayon ang ila pagkoordinar kag pag-obserbar kaupod ang iban pa nga mga education offices.
Dugang pa niya, ginaduso sang ahensiya ang zero tolerance on bullying, kun sa diin wala gid nila ginapabay-an kun may report natuhoy sa nasambit nga insidente.
Kaangot diri, gina-activate man nila gilayon ang child protection committee agud mahatagan sang nagakaangay nga counseling ang pareho nga biktima kag perpetrator.
May yara man sang mando ang DepEd nga safe and motivation learning environment kun sa diin nalakip diri ang education and awareness, advocacy and social media regulation, kag interventions and school monitoring and reporting.
