Nagahulat ang challenging game para sa Philippine women’s national football team ukon Filipinas matapos sila malakip sa Group B upod ang North Korea, South Korea kag China sa AFC Women’s Olympic Qualifying Tournament para sa 2028 Los Angeles Olympics.
Ginhiwat ang draw ceremony kahapon nga adlaw, Nobyembre 12 sa AFC House sa Kuala Lumpur, Malaysia.
Sa idalom sang bag-o nga qualification format, maga-atubangay ang mga koponan paagi sa home-and-away format sa tatlo ka qualifying windows nga pagahiwaton sa Abril, Oktubre kag Nobyembre 2027.
Samtang, yara sa Group A ang Japan, Australia, Chinese Taipei kag Uzbekistan.
Ang duha ka mangin kampeon sang tagsa ka grupo amo ang direkta nga makakuha sang slot sa 2028 Los Angeles Olympics.
Samtang, magaatubangay sa two-legged playoff sa Pebrero 2028 ang mga koponan nga makakuha sang ikaduha nga puwesto agud makuha ang slot sa AFC-CONMEBOL playoff kontra Argentina.
Isa ka dako nga pagpanghangkat ini para sa koponan ni coach Mark Torcaso ang ila mga kontra sa Group B bangud tatlo sa ila ang yara sa Top 20 sang FIFA women’s world rankings.
Mangin preparasyon sang Filipinas ang una nga qualifying window para sa ila pagbalik sa FIFA Women’s World Cup sa Hulyo 2027 nga pagahiwaton sa Brazil.
Ini ang ikaduha nga beses nga magapartisipar ang Filipinas sa Olympic Qualifiers matapos sila makasulod sa second round sang torneo sang 2023.
