Gin-engganyo sang presidente sang Association of Brgy Captains (ABC)- La Paz District ang mga pumuluyo nga magkooperar sa pagpaninlo sa mga panimalay bangud sang nagataas nga kaso sang dengue sa amo nga lugar.
Base sa latest nga data sang Iloilo City Health Office, nalakip ang pila ka barangay sa La Paz sa 31 ka mga barangay nga may clustering of cases sang dengue.
Ini amo ang Hinactacan nga may 12 ka kaso kag Burgos-Mabini nga may pito ka kaso.
Sa interview sang Bombo Radyo kay Punong Barangay Ruby Ann Geanga, iya ginpahayag nga tuman gid ka importante subong nga sundon sang pumuluyo ang 4S Kontra Dengue nga nagakahulugan sang Search and Destroy, Secure Self-Protection, Seek Early Consultation, kag Support Fogging/Spraying.
Nagpanawagan man ini sa tanan nga pumuluyo nga magkooperar indi lang sa ila panimalay kundi sa bilog nga komunidad sa pagpaninlo sang palibot agud matapna ang balatian nga dala sang mga lamok.
