Nag-isyu na sang extradition warrants ang isa ka korte sa Makati batok sa religious leader nga si Apollo Quiboloy kag duha niya ka kaupod nga respondents kasunod sang extradition request sang Estados Unidos sang Amerika.
Suno sa Department of Justice (DOJ), nag-isyu sang warrant of arrest ang Makati Regional Trial Court Branch 145 kahapon, Nobyembre 12, batok kanday Quiboloy, Teresita Tolibas Dandan kag Helen Panilag matapos nga nakakita ang korte sang probable cause ukon bastante nga basehan para sa ila pag-aresto.
Nag-isyu man ang korte sang Hold Departure Order batok sa tatlo agud mapunggan ang ila posible nga paghalin sa Pilipinas.
Sa idalom sang Rules on Extradition Proceedings, dapat personal nga mahatag sa mga respondent ang summons, kopya sang petisyon kag mga kalakip sini sa oras nga mahibaluan sang korte nga nadakpan na ang mga ini.
May yara man sila sang 15 ka adlaw halin sa pagbaton sang mga dokumento agud makapasa sang ila pormal nga sabat sa petisyon.
Nahibaluan nga ginbaton sang Makati RTC ang extradition request sang Estados Unidos sang Nobyembre 9.
Liwat nga ginadeklarar ni Quiboloy nga wala sang kamatuoran ang tanan nga alegasyon batok sa iya.
Sa Pilipinas, padayon siya nga naka-detain samtang ginapangatubang ang mga kaso nga child abuse kag sexual abuse sa korte sa Quezon City, kag qualified human trafficking sa Pasig City.
Lakip sa mga kaso nga ginapangatubang ni Quiboloy sa Estados Unidos ang international human trafficking, sex trafficking, conspiracy kag bulk cash smuggling. Ginasuspetsahan man siya kag ang iban nga miyembro sang Kingdom of Jesus Christ nga nag-recruit sang mga babayi kag mga dalagita bilang personal assistants kag ginpwersa nga magpartisipar sa sex trafficking.
