Mautang lang kuntani, apang na-scam pa sang masobra P61,000.
Ini ang nangin kapalaran sang 26-anyos nga babaye sa Banate, Iloilo nga subong nagdangop na sa Regional Anti-Cybercrime Unit (RACU) VI agud mabuligan nga mabawi ang iya kwarta.
Sa interview sang Bombo Radyo kay Jana nga amo ang biktima, iya ginpahayag nga nakilala lang sini ang babaye online nga nagtanyag sa iya sang loan paagi sa isa ka account.
P50,000 lang kuntani ang utangon ni Jana, apang ginsiling sa iya nga P80,000 ang minimum nga loan gani nga nagpasugot siya nga mag-utang sang amo nga kantidad.
Nag-fill out siya sang form kun sa diin nabutang ang iya personal nga impormasyon.
Kasunod sini, gin-obrahan siya sang account sa website kag ginpasulod man siya sa group chat kaupod ang iban man nga ginapahayag nga gusto man mag-utang.
Sang hapon sang amo man nga adlaw, gin-anunsyo nga ma-release na insigida ang loan kag nadala siya sa lista sang mga naaprubahan nga loan applicants.
Kasunod sini, suno sa iya, ginhambalan siya sang loan officer nga kinahanglan sini mag-deposit sang kwarta sa ila account sa website kun sa diin ang kadakuon sang i-deposit nakadepende man sa balor sang kwarta nga luyag utangon.
Nag-deposit si Jana sang P8,800 kag sunod sini nakit-an nga nag-reflect na ang P80,000 sa iya account sa website.
Sang gin-withdraw niya ini kag gin-contact ang loan officer kun paano ma-claim, ginhambalan siya nga sala ang iya gin-withdraw kag kinahanglan sini nga i-recover ang account paagi sa pag-send na naman sang P20,000 para sa bag-o nga code nga ihatag sa iya.
Matapos maka-send sang kwarta, liwat naman nga gin-contact ang biktima kag ginhambalan nga sala na naman ang account number nga iya nabutang gani ginapa-send na naman siya sang P32,640 agud ma-unlock ang account.
Bangud ginhambalan siya sang “finance manager” nga indi mabuksan ang iya account kun indi siya mag-send sang bag-o nga kantidad, nagpadala pa gid liwat ang biktima; apang nasulit na naman ang hitabo kag ginpangayuan siya sang P42,000.
Wala na sang kwarta si Jana gani nga naghingyo na ini sang bulig sa kaupdanan sa group chat apang wala siya ginsabat kag sang ulihi gin-block pa gani nga nakapinsar na siya nga gin-scam ini.
Gintinguhaan ni Jana nga kuhaon ang iya kwarta apang wala nangin madinalag-on bisan pa sang iya pagpakitluoy.
Nagapanawagan man sya mga nag-scam sa iya nga magpakilala na sa iya agud ma-settle na ang natabo.
IKAW MAUTANG, IKAW PA MAHATAG SANG KWARTA?
Nagpaandam naman ang RACU VI batok sa mga modus sang pagpang-scam nga ginahimo paagi sa Online Lending Application.
Ini ang ginpahayag ni Police Major Froilan Domile, ang officer in charge sang Operation Section sang RACU VI kasunod sang reklamo nga gindangop ni Jana.
Suno kay Domile, dapat nga maghalong gid ang publiko kag i-check gid anay antes maghatag sang personal nga mga impormasyon sa mga indi lehitimo nga lending applications.
Pahayag sini, isa na ka red flag nga makita amo nga ang manug-utang pa mismo ang kinahanglan nga maghatag ukon mag-deposit sang kwarta agud ma-active ang PIN ukon code.
Dugang pa sini, mas maayo gid kun mag-file sang formal complaint sa ila nga opisina ang biktima agud nga masuguran man nila ang imbestigasyon.
Sa tion nga mahibaluan kung sin-o nga indibidwal ang yara sa likod sang pagpang-scam, mangatubang ini sang complaint nga swindling/estafa sa idalom sang Article 315 in relation to Section 6 sang RA 10175 ukon Cybercrime Prevention Act.#
