Napasar na sa Sangguniang Panlungsod ang Traffic Impact Assessment (TIA) Ordinance sang Iloilo City nga nagatuyo nga malikawan ang pagpug-ok sang trapiko bangud sa nagadamo nga development sa syudad.
Sa interview sang Bombo Radyo kay Councilor Sedfrey Cabaluna, Chair sang Committee on Transportation kag author sang nasambit nga ordinansa, kabahin ini sang tikang sang lokal nga gobyerno agud mangin preparado sa nagadamo nga development, samtang naguswag ang Iloilo City bilang highly urbanized, competitive kag liveable nga syudad.
Paagi sa nasambit nga ordinansa, ang mga negosyante kag developers nga nagaplano nga magpatukod sang mga bag-o nga establisemento kaangay sang malls, condominiums kag subdivisions mahimo nga ipaga-presentar sang Traffic Impact Analysis ukon pagtuon sa posible nga epekto sang ila proyekto sa posible nga trapiko.
Lakip posible nga ipaga-presentar sang nasambit nga analysis ang mga development nga malapit sa major intersection kag mga renovation nga mahimo magresulta sa pagdamo sang salakyan sa palibot nga lugar.
Kinahanglan man nga may yara sang datos kag pagtuon ang mga developers parte sa posible nga epekto sang ila proyekto, lakip na ang preventive kag corrective measures agud malikawan ukon masolusyunan ang posible nga pagpugok sang trapiko.
Paagi sa implementasyon sang ordinansa, ginapaabot nga mangin mas mahapos kag mas maayo ang oportunidad para sa pagbiyahe kag paglihok sang mga pumuluyo sa sulod sang syudad.
Gin-athag man sang opisyal nga mas mangin preparado ang syudad sa palaabuton nga mga development kag indi na mahimo pa nga magtuhaw ang problema sa trapiko antes magpatuman sang solusyon.
