Naospital ang 32 ka pasahero matapos magbunggu-anay ang isa ka tanker ship kag cruise ship sa Mississippi River sa New Orleans, Louisiana.
Suno kay New Orleans Mayor Helena Moreno, naga-lab-ot sa 180 tubtob 190 ka pasahero kag tripulante ang sakay sang cruise ship nga American Heritage sang natabo ang insidente.
Bangud sa mabaskog nga puwersa sang pagbunggo, natumba kag nalunod ang cruise ship samtang nagkinaran-karan naman ang mga pasahero kag ang iban nahulog sa dagat.
Ginkumpirma sang mga awtoridad nga naluwas ang tanan nga sakay sang barko kag wala sa 32 ka pasahero nga naospital ang nakaangkon sang madalom nga pilas.
Base sa pauna nga impormasyon, ginapatihan nga nadulaan sang kontrol ang tanker nga Atlantic Asphalt bangud sa posible nga problema sa manibela antes ini nagbunggo sa cruise ship nga naka-pwesto sa pantalan.
Gilayon nga nagresponde ang mga personnel sang pantalan, bombero, pulis kag mga sibilyan agud luwason ang mga pasahero nga nahulog sa tubig.
Samtang, temporaryo anay nga ginsiraduhan sang US Coast Guard ang alagyan sang mga barko sa amo nga lugar samtang nagapadayon ang imbestigasyon agud mahibaluan ang matuod nga rason sang aksidente.
