Ginpasiguro ni Deputy Speaker kag Iloilo Representative Janette Garin nga handa ang House of Representatives nga sabton ang mga palamangkutanon may kaangtanan sa ginapahayag nga mga iregularidad sa ginaproponer nga P7.2 trilyon nga national budget para sa tuig 2027.
Suno kay Garin, bukas ang Kongreso sa mga kritisismo kag handa ini nga magpamati sa mga reklamo kag ginakabalak-an sang mga budget watchdogs.
Lakip sa ginakwestiyon sang mga grupo sang civil society amo ang mga alokasyon para sa mga proyekto sa imprastraktura, ayuda, healtcare service, kag mga programa sa agrikultura.
Apang ginpahayag ni Garin nga wala sang bastante nga basehan ang mga alegasyon nahanungod sa masobra P1 trilyon nga kantidad sang mga proyekto nga ginakwestiyon.
Ginpaathag man niya nga ang mga ginaproponer nga proyekto ginabusisi na sang Department of Budget and Management kag sang executives nga sanga sang gobyerno antes ini ginpasa sa Kamara.
Samtang, ginpaathag man ni Garin nga mahimo magbag-o ang mga prayoridad sang mga ahensiya bangod sa mga kalamidad kag iban pa nga emerhensya nga nagakinahanglan sang gilayon nga pondo.
Ginakabig nga talakayon sa Senado sa Nobyembre 27 ang House Bill No. 10858 ukon ang ginaproponer nga 2027 General Appropriations Bill bilang kabahin sang padayon nga pagbusisi sa national budget.
