‎Artificial Intelligence (AI) ang isa sa ginbasehan ni Iloilo City Councilor Romel Duron sa pagtan-aw kung mahimo nga mangin co-author si Iloilo City Vice Mayor Lady Julie Grace Baronda sang proposed Comprehensive Youth Development Code ni SK Federation President Jelma Crystel Implica.
‎
‎Sa deliberasyon sang Sangguniang Panlungsod, ginpresentar ni Duron ang sabat sang AI nga nagasiling nga ang regular presiding officer pareho sang vice mayor indi mahimo nga mag-co-author, mag-sponsor, mag-introduce ukon magdebate sang isa ka proposed ordinance.
‎
‎Ginpahayag ni Duron nga ang iya pagpangita sang sabat paagi sa AI nakabase man sa DILG Opinion No. 95, Series of 2025, nga amo ang isa sa mga ginatamod nga basehan sa pagtalakay sang papel ni Baronda sa konseho.
‎
‎Ginpaathag man niya nga para sa iya, halos kaangay lamang ang pag-sponsor kag pag-co-author sang ordinansa bangud ang duha nagapakita sang suporta ukon pag-ugyon sa isa ka proposed measure.
‎
‎Apang ginpaathag man ni Iloilo City Councilor Rex Marcus Sarabia nga isa ini ka “gray area” ukon butang nga kinahanglan pa sang maathag nga interpretasyon, gani ginpanawagan niya ang paghalong sa pagdesisyon kag ang pagtan-aw sa mga regulasyon nga nagatuhaw sa local government units, imbes nga magsalig lamang sa parliamentary practices sang Kongreso.
‎
‎Ginpahayag man sa deliberasyon nga lain ang proseso kag mga patakaran nga nagagiya sa Kongreso kag sa local legislative bodies, gani kinahanglan nga ang Local Government Code kag ang mga nagakaigo nga guidelines amo ang mangin basihan.
‎
‎Samtang, nagsiling man si Iloilo City Councilor Jose Maria “Nene” De La Llana nga nagadependi ini kay Implica kung luyag niya batunon ang panugyan ni Baronda nga mangin co-author sa nasambit nga ordinansa.

Bangud sini, nagsabat na lang si Duron nga, “As much as possible, I don’t want to talk”.
‎
‎Ang isyu naghalin sa pagmanifest ni Baronda nga luyag niya mangin co-author sang proposed Comprehensive Youth Development Code ni Implica bangud madamo sa mga probisyon sini ang kaangay sang iya man nga gin-author nga ordinansa nga natuhoy sa Iloilo City Youth Development Council.
‎
‎Tungod sa wala pa masolbar nga pamangkot parte sa co-authorship ni Baronda, ginbawi ni Implica ang iya motion nga ipasar ang ordinansa sa second and final reading kag ginpasar na lamang ini sa second reading.

Text by: Bombo Cyrene A. Nasis