Nagnubo sang 30.37 porsyento ang kaso sang pagpangawat sa Iloilo City sa una nga 10 ka bulan sa tuig 2026 base sa rekord sang Iloilo City Police Office (ICPO).

Suno sa datos sang City Investigation and Detective Management Unit (CIDMU), nagdangat sa 94 nga kaso sang pagpangawat ang na-rekord halin Enero tubtob Oktubre 2026, kumparar sa 135 nga kaso sa kapareho nga period sang tuig 2025.

Apisar sining pagnubo sang kaso, ginpahanumdom ni ICPO City Director PCOL Wilbert B. Parilla ang publiko nga mangin mabinantayon gid sa ila mga pagkabutang, ilabi na sa palaabuton nga holiday season.

Gina-rekomendar sang ICPO nga likawan ang pagpakita sang dako nga kantidad sang kwarta kag alahas sa publiko, mangin alerto sa pag-withdraw sang kwarta, siguruhon nga nakasarado ang mga balay kag salakyan antes maghalin.

Mahimo man nga i-report gilayon ang mga makaduluda nga tawo ukon aktibidad sa pinakamalapit nga police station. (By: Bombo Glenette Delit)