Nagguwa sa Pilipinas si anay Bamban, Tarlac Mayor Alice Guo ukon ang Chinese national nga si Guo Hua Ping nga wala na nag-agi pa sa immigration authorities sang pungsod.
Base ini sa intelligence report sang Bureau of Immigration (BI) suno kay Immigration Commissioner Norman Tansingco.
Pahayag ni Tansingco, base sa ila nga intel report, iligal nga nagbyahe ang kontrobersyal nga dismissed mayor sa Malaysia sang Hulyo kag sunod nga naglupad pa-Singapore kaupod si Sheila Guo kag Wesley Guo sang Hulyo 21.
Suno kay Tansingco, apisar nga nalista ang pangalan ni Guo sa immigration lookout bulletin sang Department of Justice (DOJ), wala na-rekord ang iya departure sa immigration system kag centralized database.
Nahibaluan nga ang BI ang may presensya gid sa tanan nga regular international ports of entry and exit kaangay sang international airports kag seaports kun sa diin ang informal exit points ang gina-manage kag gina-monitor sang iban nga aviation ukon maritime agencies.
PAANO NAKAGUWA?
Subong nga adlaw sang ginbulgar ni Senator Risa Hontiveros nga nakaguwa na sa Pilipinas si Guo gamit ang iya Philippine passport sang Hulyo 18, 2024 kag nagtapak sa Kuala Lumpur, Malaysia sang amo man nga adlaw.
Nagkadto ini sa Singapore agud makigkita sa iya amay nga si Guo Jian Zhong, iloy nga si Lin Wen Yi, utod nga nga si Wesley Ong kag Cassandra Ong nga amo ang ginhingadlan nga representative sang Lucky South 99, ang POGO hub nga gin-raid sa Porac, Pampanga.
Suno naman kay Justice spokesperson Atty. Mico Clavano, wala sang nabaton nga report of departure ang Department of Justice (DOJ) halin sa Bureau of Immigration (BI) gani nga sa pagkahibalo sang ahensya, diri pa sa Pilipinas si Guo.
Ginpahayag ni Clavano nga magapadayon ang ahensya sa pagtipon sang mga impormasyon halin sa BI kag sa National Bureau of Investigation.
“This is a case of national significance. Thus if it is indeed true that Alice Guo has left the country, a thorough investigation is needed to hold those responsible accountable. This is not a light matter,” pahayag sini.
Apang suno sa natungdan, sang nagligad nga Biyernes, naka-file pa ang anay alkalde sang counter-affidavit sa DOJ nga gin-notarize sang Agusto 14 sa San Jose Del Monte City, Bulacan.
Ginsiling man sini nga may “sightings” pa kay Guo pagkatapos sang Hulyo 18.
Ginsegunduhan man ini ni Justice Undersecretary Nicholas Felix Ty paagi sa pahayag nga: “As far as we know, Mayor Guo is still in the country. There has been no report to us of an attempted departure from the Bureau of Immigration … There have been reported sightings from LEAs [law enforcement agencies] after July 18, 2024.”
Sa bahin ni Presidential Anti-Organized Crime Commission spokesperson Dr. Winston Casio, ginsiling nga nagapakig-angot sila sa ila nga local partners kag foreign counterparts.
Nagakoordinar man sa Malaysian kag Singaporean officials ang National Bureau of Investigation suno kay NBI chief Director Jaime Santiago para nga ma-verify ang naglupok nga impormasyon.
