Ginbawian gid sang kabuhi ang isa ka amay matapos nga nalumos samtang nagapamukot sa suba sa Barangay Bitoon, Jaro, Iloilo City.
Ang biktima amo si Rolando Patajo, 42-anyos, residente sang amo nga barangay.
Sa interview sang Bombo Radyo Iloilo kay Juvylyn Usalia, utod sang biktima, iya ginpahayag nga kahapon sang hapon sang naglakat ang iya nga magulang upod sang duha ka menor de edad nga mga kabataan agud nga magpamukot.
Dugang pa ni Usalia, kagab-i sang nagpauli ang kabataan sang biktima apang indi upod ang ila amay kag nagapangayo ang mga ini sang bulig bangud ginpahayag nga ginbiring ini kag nalumos.
Gilayon nga ginpangita ang biktima apang sini nga aga lang nasapwan ang iya lawas nga wala na sang kabuhi.
Bangud sa natabo, nailo sa amay ang pito sini ka mga kabataan.
