Nagpromisa ang Amerika sang $100 million ukon masobra P5.5 billion para sa medium-lift helicopters nga mahimo magamit para sa pag-responde kun may mga kalamidad kag amo man para sa non-combat operations sang Armed Forces of the Philippines.
Suno kay Defense department officer in charge Carlito Galvez, ginpasaka man sang Amerika sa masobra P5.5 billion ang pondo para sa pasilidad sang militar sang Pilipinas nga mahimo ma-access sang US forces sa idalom sang Enhanced Defense Cooperation Agreement ukon EDCA.
Suno kay Galvez, kalabanan sa mga proyekto sa EDCA sites ang naka-shedule nga matapos sa katapusan sang 2023.
Kalabanan sa sini nga mga proyekto amo ang para sa warehousing kag suludlan sang humanitarian assistance kag mga materyales nga galamiton kun mag-responde na sa kalamidad.
May yara subong sang lima ka EDCA locations nga nahamtang sa Antonio Bautista Air Base sa Palawan, Basa Air Base sa Pampanga, Fort Magsaysay sa Nueva Ecija, Mactan-Benito Ebuen Air Base sa Cebu, kag Lumbia Air Base sa Cagayan de Oro City.
Sang temprano nga bahin sang Abril, may gin-anunsyo ang Philippine kag US officials nga dugang nga apat ka EDCA sites nga nahamtang naman sa Naval Base Camilo Osias sa Sta Ana, Cagayan; Lal-lo Airport sa Lal-lo, Cagayan; Camp Melchor Dela Cruz sa Gamu, Isabela; kag Balabac Island sa Palawan.
