Nagapangatubang sang reklamo nga plunder sa Office of the Ombudsman si anay Senate President Francis ‘Chiz’ Escudero bangud sang gina-alegar nga P586 milyon nga kickback halin sa mga flood control project.
Ini ginrekomendar sang Field Investigation Office sang Ombudsman ang pagsaka sang kaso nga plunder, graft, kag indirect bribery batok kay Escudero.
Base sa reklamo, nakabaton si Escudero sang ginabulubanta nga P306 milyon kag P280 milyon halin sa nagkalain-lain nga flood control projects sa pila ka mga lugar sa Pilipinas.
Ang mga alegasyon nakabase sa testimonya ni anay DPWH Undersecretary Roberto Bernardo, nga nagsiling nga ang kuwarta gindala sa negosyante nga si Maynard Ngu, nga ginlaragway bilang abyan, campaign donor, kag gina-alegar middleman ni Escudero.
Samtang, ginpanginwala naman ni Escudero ang tanan nga alegasyon kag nagsiling nga wala niya gintugutan si Ngu nga magdonar sa iya kag wala sang ebidensya nga siya mismo ang nakabaton sang kwarta.
Gin-kwestyon man sini ang kredibilidad ni Bernardo bangud sang mga nagkalain-lain nga pahayag sini sa iya mga affidavit.
Ginapahayag man sang senador nga si Bernardo ang “mas may dako nga sala” bangud siya mismo ang nagpanumpa nga nakabaton ini sang kapin P1 bilyon nga kickback may kaangtanan sa flood control scandal.
