Nagpaandam ang Department of Agriculture (DA) nga posible maglab-ot sa P580 ang presyo sang kada kilo sang baboy kun magpadayon pa sa pagtimbuok ang presyo sang gatong.
Sa Senate hearing, ginpaathag ni Agriculture Assistant Secretary U-Nichols Manalo nga ang gyera sa Middle East mahimo makaapekto man sa gasto sa feeds rason nga mapataas ang farmgate prices sang livestock.
Ginaantisipar man gani suno sa opisyal nga magpanirado na lang anay ang smallholders ukon magpangita anay sang iban nga negosyo.
Ginsugid man sini sa upper chamber sang Kongreso ang worst-case scenario.
Kun magpadayon pa ang gyera tubtub sa Agusto kag maglab-ot ang presyo sang langis sa average nga $200 kada bariles, ang posibilidad suno sa ahensya amo nga magadangat man ang retail prices sang local pork ham sa P558.10 per kilo samtang P588.10 per kilo naman ang pork belly.
Kun matabo, 59% ang isaka sini halin sa average retail prices nga na-rekord antes ang gyera nga P350 tubtub P370 per kilo.
Magluwas sa presyo sang baboy, mahimo man magsaka sa P324.64 per kilo ang retail prices sa manok halin sa P200 per kilo nga presyo antes ang gyera.
Kun basehan naman ang Samahang Industriya ng Agrikultura (SINAG), posible nga indi na malab-ot ang “worst-case scenario” bangud sang suspensyon sang excise tax sa produktong petrolyo.
Una naman nga ginpaathag ni Agriculture Secretary Francisco Tiu Laurel Jr. nga apektado sang gyera ang presyo sang pagkaon bangud sa pagsaka sa logistics kag input costs ilabi na ang urea-based fertilizer. Ang nagapanguna nga ginakabalak-an sang DA amo ang mga pagpamomba sa Strait of Hormuz nga isa ka importante nga alagyan sang fertilizer supply.#
(Photo: Ryan Baldemor)
