Gin-akusaran sang grupo sang mga mangunguma ang Department of Agriculture (DA) nga nagatuga sang panic bangud sang ila nga anunsyo nga may matabo nga 10 ka adlaw nga kakulangan sa suplay sa karne sang baboy sa fourth quarter sang 2023.
Suno sa Samahang Industriya ng Agrikultura ukon Sinag, ang amo nga anunsyo ang mahimo man magtuga sang pagsaka sa retail prices sang mga meat products.
Pahayag ni Sinag executive director Jayson Cainglet, ang Department of Agriculture man ang nagpaguwa sang statement nga may kakulangan sa suplay sang bugas, apang sang ulihi nagguwa nga ang kulang amo ang buffer stock sang National Food Authority.
Bangud sang amo nga “iresponsable” nga pahayag suno sa opisyal, may natuga nga panic kag nagsaka ang retail price sang bugas.
Matandaan nga Oktubre 10 sang nagsiling si newly designated Agriculture spokesman Arnel de Mesa nga ginalantaw sang gobyerno ang pork importation bangud sa 10 ka adlaw nga local supply shortage sa hingapusan sang sini nga tuig.
Apang suno kay Cainglet, ang amo nga projection sang ahensya ang wala nagalakip sa mga kasudlan nga mataas man ang consumption bangud pwede man ini sa hotdogs kag processed meats.
Wala man naisip suno sa iya ang imported meat sa cold storage facilities.
Dugang pa ni Cainglet, nag-isyu ang Bureau of Animal Industry sang sanitary kag phytosanitary import clearance nga nagadangat sa 900 million kilos, gani indi sini mahangpan ang punto kun ngaa kinahanglan pa mag-request sang dugang nga importation kun padayon man ang pag-abot sang imported nga frozen pork.
Pahayag pa sini, subong pa lang nga daan, nagnubo na sang P20 ang farmgate price sa baboy nga yara na lang sa P160 per kilo halin sa nauna nga P180 per kilo. #
