Nadala sa paga-imbistigaran sang Department of Justice base man sa hingyo sang Presidential Communications Office ang Ilongga vlogger nga si “Iloy Bugris: The Queen of Revelations.”
Ini kaangot sa ginapahayag pagpalapta sini sang fake news nahanungod sa sitwasyon sang ikaayong lawas ni President Ferdinand “Bongbong” Marcos Jr.
Base sa PCO, kaupod sini nga paga-imbestigaran sanday “Rigondola Ping,” kag “Crage Anderpal” nga ginapahayag naga-post sang fake medical documents, mga peke nga litrato kag indi matuod nga kondisyon sang Presidente.
Suno sa PCO, ang mga ginhimo sang mga nasambit nga indibidwal mahimo maglapas sa Article 154 sang Revised Penal Code kag sa Cybercrime Prevention Act, ilabi na subong nga may ara sang ginapangatubang nga State of National Energy Emergency ang pungsod.
Gilayon naman nga nagpagwa sang pahayag si Iloy Bugris nga suno pa sa iya ang mga impormasyon nga iya ginapagwa ang kabahin sang transparency sa isa ka demokratiko nga sistema nahanungod sa ikaayong lawas sang Presidente.
Nahibaluan nga ini nga kasugtanan ginalakipan sang PCO, Department of Justice, kag Department of Information and Communications Technology agud pabaskugon pa ang kampanya batok sa online disinformation kag deepfakes.
