SIBUNAG, GUIMARAS – Arestado ang apat ka lalaki sa Brgy. San Isidro, Sibunag, Guimaras bangud sang paglapas sa Cockfighting Law of 1974 ukon pagpatigayon sang iligal nga pabulang.
Ang mga nadakpan amo sanday Sulpicio Gamilong, Steve Villasis, Ronnie Galabo, lunsay mga residente sang banwa sang Sibunag.
Kaupod man sang mga naaresto si Lemuel Galabo, residente sang Barangay Calaya, Nueva Valencia, Guimaras.
Sa interview sang Bombo Radyo kay Pol. Lt. Val Cambel, hepe sang Sibunag Municipal Police Station, iya ginpahayag nga nakuha sa lugar nga ginpatigayunan sang iligal nga pabulang ang P3,910 nga amo ang bet money, isa ka gaff with tape, kag pito ka mga inugbulang nga manok.
Sa idalom sang puno sang paho nagapa-bulang ang apat ka mga lalaki sa natago nga lugar sa barangay.
Ginapahayag nga duha ka semana na nga ginapatigayon sang mag-abyan ang amo nga iligal nga aktibidad.
Padayon naman ang kampanya sang otoridad agud tapnaon ang illegal cockfighting activities sa probinsya sang Guimaras.
