Ginapaabot nga magsulod si Severe Tropical Storm “Podul” sa Philippine Area of Responsibility (PAR) sa masunod nga 24 oras.
Suno sa alas dos sa hapon nga weather advisory sang PAGASA, nakit-an si Podul sa kalayuon nga 1,615 kilometros nasidlangan sang Extreme Northern Luzon. Dala sini ang kabaskugon sang hangin nga 110 km/h kag nagahulag pa-nakatundan sa kadasigon nga 20 km/h.
Base naman sa 11 a.m. tropical cyclone advisory, padayon nga nagadasig si Podul samtang nga ginapabilin man ang kabaskugon sini.
Kun opisyal na nga makasulod sa PAR, pagatawgon ini nga si “Gorio”.
“PODUL is forecast to move generally westward today and tomorrow (11 August), then west northwestward or northwestward from Tuesday (12 August) through the end of the forecast period. PODUL may enter the Philippine Area of Responsibility between tonight and tomorrow early morning,” suno sa weather bureau.
Sandig sa general outlook para sa forecast period sang PAGASA, manubo ang tyansa nga direkta nga maapektuhan sang bagyo ang weather and sea conditions sa pungsod sa masunod nga lima ka adlaw.
“On the track forecast, PODUL may pass close or over the southern Ryukyu Islands on Wednesday (13 August) morning. Furthermore, a landfall scenario over Taiwan on Wednesday afternoon or evening is also not ruled out,” pahayag sang PAGASA.
Padayon nga ginapahanumdom sang ahensya sa public and disaster risk reduction and management offices nga magpadayon sa monitoring para sa updates sa dalagan sang tyempo.#
