Ginpanubo na sa Wind Signal No. 1 ang Iloilo samtang nga yara na ang Bagyo Tino sa kadagatan nga sakop sang northern Palawan.
Sa alas dos sa kaagahon nga weather bulletin sang Philippine Atmospheric, Geophysical and Astronomical Services Administration (PAGASA) subong nga Myerkules, Nobyembre 5, nabutang naman sa Signal Number 2 ang Antique lakip na ang Caluya Islands kag ang northwesternmost portion sang Aklan (Buruanga, Malay).
Signal number 1 man ang nabilin nga bahin sang Aklan, Capiz, kag ang Guimaras.
Ulihi nga nakit-an ang mata sang bagyo sa coastal waters sang Araceli, Palawan dala ang kabaskugon sang hangin nga 120 km/h malapit sa sentro kag pagmadlos nga tubtub sa 165 km/h.
Nagahulag ini sa direksyon nga pa-nakatundan sa kadasigon nga 25 km/h.
Gina-forecast nga maga-landfall liwat ang Bagyo Tino sa northern Palawan area subong nga aga antes ini magtuhaw sa West Philippine Sea.
Sa forecast track, magaguwa ini sa Philippine Area of Responsibility karon sa gab-i ukon buwas sa aga.
