PASSI CITY – Limitado lamang ang resources sang Passi City Government may kaangtanan sa pagbulig sa mga Locally Stranded Individual nga nagapabilin sa subong sa Metro Manila.
Ini ang ginpahayag sa Bombo Radyo ni Mayor Stephen Palmares may kaangtanan sa ginapalab-ot nga reklamo sang mga Passinhon nga tubtub subong, wala pa nakapauli.
Suno kay Palmares, may yara sang Balik Passi Program nga gintukod kun sa diin may yara man sang in-charge tuhoy diri.
Ginpahayag ni Palmares nga wala gid nagaduha-duha ang Passi City Government sa pagbulig sa mga magapauli nga Locally Stranded Individual kun ini ang masarangan man lang sang resources.
Bilang protocol suno sa natungdan, ginasugat sa pantalan ukon sa paluparan ang mga Locally Stranded Individual agud dal-on sa quarantine facility, ipaidalom sa COVID-19 test kag kun magnegatibo ang resulta, mahimo na sila nga makapauli sa ila tagsa ka panimalay.
Sa pihak sini, ginpahayag sang alkalde nga bangud sa ginapatuman nga restriction kag limitado man lang ang resources sang Local Government Unit, indi tanan nga Locally Stranded Individual ang mahatagan sang bulig.
