Nagpaathag ang Department of Foreign Affairs (DFA) nga “honest mistake” gid lamang ang natabo nga baliskad ang flag sang Pilipinas sang tion nga nag-istoryahanay sanday President Ferdinand “Bongbong” Marcos Jr. kag Canadian Prime Minister Justin Trudeau.
Natabo ini sa bilateral meeting sang duha ka lider sa 43rd Association of Southeast Asian Nations (Asean) Summit sa Jakarta, Indonesia.
Sang ginpa-guwa na ang laragway sang duha, nakit-an gilayon nga baliskad ang hayahay sang Pilipinas (sa ibabaw ang pula kag sa idalom ang blue) nga nagakahulugan nga may gyera sa Pilipinas.
Suno naman kay DFA Undersecretary Ma. Theresa Lazaro, “It was an honest mistake that had nothing to do with our protocol officers.”
Ginmuno lang sang DFA official nga padayon ang kumpetisyon sa medyas nanday Marcos kag Trudeau.
Kun matandaan, sang Nobyembre 2022, may mga laragway man ang duha ka lider nga pareho nga nakasuksok sang maduagon nga mga medyas nga ginkabig na nga “battle of the socks.”
Sa amo nga meeting, gin-imbitahan man ni Trudeau si Marcos sa pagbisita sa Canada sa masunod nga tuig nga kadungan sang 75 years sang diplomatic relations sang Canada kag Pilipinas sa 2024.#
