ILOILO CITY- Nagsaka pa sa masobra P700 million ang halit nga natuga sang El Niño Phenomenon sa Western Visayas.
Sa interview sang Bombo Radyo kay Cindy Ferrer, Spokesperon sang Office of Civil Defense Region 6, iya ginpahayag nga ang Iloilo ang may pinakamataas nga nabalhag nga kahalitan sa humayan kag maisan nga may kapin 14,528 hectares sa diin 32,722 metric tons ang nahalitan nga produkto nga nagabalor sang P513.5 million.
Suno kay Ferrer, naglab-ot naman sa 19,000 ka mga mangunguma sa rehiyon sais ang nahalitan sang kalamidad.
Ginpahayag man sang natungdan nga santo sa report sang Iloilo Provincial Agriculture Office, 25 na ka mga kabanwahanan ang nahalitan sang El Niño Phenomenon.
Gina-ekspektar naman sang Office of Civil Defense nga samtang nagapasulod ang summer season, madugangan pa ang balor sang kahalitan sa Western Visayas.
Nagapadayon man ang assessment sang ahensya sa tagsa ka local government unit sa probinsya agud malantaw ang parameters kun posible na nga mapaidalum ini sa state of calamity.
