GUIMARAS – Wala pa sa gihapon nakilala ang patay nga lalaki nga nagsampay sa baybayon sa Barangay East Valencia, Buenavista, Guimaras.
Ang lalaki ang ginapahayag yara na sa advanced state of decomposition sang nakit-an sang mga bata kahapon sang hapon.
Suksok sang lalaki ang shorts nga gray kag itom nga bayo nga may text nga ‘Reel Fun Winner’ sa unahan.
Ginabanta 5’7″ ang kataason sini.
Wala sang pilas sa lawas sang biktima.
Sa interview sang Bombo Radyo kay Police Corporal Freddie Jallores, imbestigador sang Buenavista Municipal Police Station, iya ginpahayag nga ginabanta 3-5 na ka adlaw nga patay ang lalaki antes nakit-an ang bangkay sini.
Wala man sang reported nga missing sa Buenavista suno kay Jallores, kag nagapakig-angot man sila sa iban nga mga banwa sa Northern Iloilo kun sa diin posible naghalin ang bangkay sang lalaki.
