Wala pa sa gihapon makilal-an ang bangkay sang isa ka lalaki nga nasapwan sa idalom sang taytay sa Barangay Bantud Fabrica, Dumangas, Iloilo, kahapon nga adlaw, Hulyo 29, 2026.
Sa interview sang Bombo Radyo kay Punong Barangay Lilobert Pelaez, iya ginpahayag nga mga alas-12:30 kahapon nga adlaw sang nakita sang isa ka motorista ang bangkay nga yara na sa advanced state of decomposition.
Suno sa Punong Barangay, pasado alas-6:00 sang gab-i na sang natigayon nga mapasaka ang bangkay paagi sa bulig sang mga opisyal sang barangay kag sang personnel sang isa ka punerarya.
Ginbudlayan ang rescue team sa pagpasaka sang bangkay bangud sa mataas nga tubig sang suba kag sa madanlog nga porsyon sang lugar.
Ginklaro man ni Pelaez nga wala sang reported missing sa ila barangay kag wala man siya sang nabaton nga impormasyon halin sa mga kaiping nga barangay nga may nadula nga ila residente.
Dugang pa sang Punong Barangay, may yara sang mga pilas sa lawas sang bangkay nga posible resulta sang pagbunggo sini sa mga dalagko nga bato samtang nadala sang makusog nga tubig sang suba antes ini nasapwan sa ila barangay.
Samtang, sa interview naman sang Bombo Radyo kay Police Executive Master Sergeant Kim John Banzon, police investigator sang Dumangas Municipal Police Station, iya ginpahayag nga wala pa sang nagpakig-angot sa kapulisan nga may nadulaan sang himata nga kaangay sang identity sang nasapwan.
Suno pa kay Banzon, wala sang nakita nga pilas sa lawas sang biktima nga nagapakita sang pagbuno ukon ginsakit ini antes mapatay.
Ginpahayag man sang imbestigador nga igapaidalom sa autopsy ang bangkay agud mahibaluan ang gintunaan sang iya kamatayon.
Base paglaragway sang kapulisan, ang lalaki ang wala na sang panapton magluwas sa iya itom nga underwear.
Ginalantaw man nga may edad na ini kag nagahabok na ang iya lawas sa tion nga nasapwan ini.
