JANIUAY, ILOILO – Pilas sa wala nga kamot ang naangkon sang Barangay Kagawad matapos naluthangan sang iya man lang himata sa Sitio Katuba, Brgy. Atimonan, Janiuay, Iloilo.
Ang biktima amo si Jessie Decir Lastimoso, 38 anyos samtang ang suspect naman amo si Rodel Mamon Lastimoso, 21 anyos, lunsay residente sang nasambit nga lugar.
Sa interview sang Bombo Radyo kay Police Staff Sergeant Jessie Caro, imbestigador sang Janiuay Municipal Police Station, iya ginpahayag nga daan nga hiligut-anon ang motibo sa insidente.
Suno kay Caro, yara sa sulod sang perimeter fence ang biktima sang ginpalapitan kag ginluthang sang suspek kaupod ang duha ka iban pa.
Ginpahayag ni Caro nga matapos ang insidente, gilayon nga nagpalagyo ang tatlo dala ang gingamit nga 12 gauge shotgun.
Sa subong, nagapabilin nga at large ang tatlo samtang yara naman sa maayo nga kahimtangan ang biktima.
