Patay ang isa ka barangay tanod sa Talayatay, Igbaras, Iloilo matapos ginlabo sang iya mismo nga hinablos.
Ang biktima ginhingadlan nga si Edwin, 53, naga-trabaho man bilang panday; samtang ang suspek naman amo si alias John, 27, lunsay residente sang amo nga barangay.
Sa interview sang Bombo Radyo kay Police Captain Francis Donne Lumahan, hepe sang Igbaras Municipal Police Station, iya ginpahayag nga sandig sa panaysayon sang testigo, gulpi lang nga nagsulod ang suspek sa balay nga gina-pandayan sang biktima kag ginhimo ang krimen.
Kun basehan ang pilas sang biktima, posible suno kay Lumahan nga wala na ini nakapanginlaman nga himuon ini sa iya.
Ginpahayag man nga maayo gid ang relasyon sang magtiyo kag wala sang anuman nga komosyon antes ang krimen.
Base pa sa impormasyon sang pulis nga nakuha halin sa area, may history sang mental health issue ang suspek kag nakasuprer sang nervous breakdown.
Padayon ang hot pursuit operation sang mga awtoridad.
Nagapaandam man ang Igbaras PNP sa publiko ilabi na sa kaiping nga mga lugar ilabi na bangud ginaalegar nga dala pa sang suspek ang iya binangon nga gingamit sa paglabo sa iya nga tiyo.
