Nag-landfall si Bagyo Basyang sa Bohol subong nga hapon.
Base sa 2:00 p.m. weather bulletin sang PAGASA, ulihi nga nakit-an ang sentro sang bagyo sa vicinity sang Bilar, Bohol.
Dala sini ang kabaskugon sang hangin nga 55 kph malapit sa sentro kag pagmadlos nga tubtub sa 75 kph. Nagahulag ini pa-nakatundan naaminhan-nakatundan sa kadasigon nga 20 kph.
Wala na sang lugar nga napaidalom sa Wind Signal No. 2 kasunod sang pagpanubo sang kategorya sa Tropical Depression halin anay sa Tropical Storm.
Yari naman ang iban nga mga lugar sa Signal No. 1 kun sa diin may warning lead time nga 36 oras kag may minimal tubtub minor nga pagpamahog sa kabuhi kag sa propiedad.
Luzon:
- southern portion sang Occidental Mindoro, southern portion sang Oriental Mindoro, Romblon, northern portion sang Palawan lakip ang Cuyo Islands, Cagayancillo Islands, Calamian Islands, kag ang southern portion sang Masbate
Visayas:
- southern portion sang Eastern Samar, southern portion sang Samar, Guimaras, Iloilo, Capiz, Antique lakip ang Caluya Islands, Aklan, Biliran, Bohol, Cebu, Negros Occidental, Negros Oriental, Leyte, Southern Leyte kag Siquijor
Mindanao:
- Dinagat Islands, Surigao del Norte, Agusan del Norte, Misamis Oriental, Misamis Occidental, Camiguin kag Zamboanga del Norte
Lifted na ukon ginbawi na ang tanan nga warnings kaangot sa posibilidad sang storm surge.
Matandaan nga una nag-landfall si Basyang sa Bayabas, Surigao del Sur sang 11:50 kagab-i.
Sandig sa track forecast sang PAGASA, magahulag ang bagyo sa direksyon nga pa-nakatundan naaminhan-nakatundan sa bilog nga forecast period.
Maga-landfall ini sa southern portions sang Cebu kag sa Negros Oriental subong nga adlaw ukon sa buwas sa kaagahon. Pagkatapos, magadiretso ang bagyo sa southern portion sang Panay Island ukon sa Panay Gulf.
Magaluya ang bagyo bilang isa ka low pressure area sa masunod nga 24 oras.
“Considering these developments, the public and disaster risk reduction and management offices concerned are advised to take all necessary measures to protect life and property. Persons living in areas identified to be highly or very highly susceptible to these hazards are advised to follow evacuation and other instructions from local officials,” suno pa sa PAGASA.#
