Emosyonal nga ginbalikan sang isa ka manunudlo ang iya inagihan antes niya malab-ot ang handom nga tungdan ang papel bilang instrumento sa masanag nga palaabuton sang kabataan.
Sa interview sang Bombo Radyo kay Concepcion Sicabalo, masobra duha ka dekada na nga manunudlo, iya ginpahayag indi mahapos ang iya nangin pagpalangkaton para lang nga makatapos ini sa pagtuon kag mangin isa ka licensed teacher.
Suno kay Sicabalo, temprano pa ini nga nailo sa ginikanan kag nagdako ini sa orphanage.
Pahayag niya, sa pihak sang iya sitwasyon, madamo sang tawo nga nangin instrumento agud makaeskwela ini kag makatapos sa kurso nga Bachelor in Elementary Education.
Ang pinakaimportante nga leksyon naman nga iya natun-an amo nga gamhanan ang pangamuyo kag pagtuo sa Diyos rason nga wala gid siya ginpabay-an kag nagmadinalag-on sa kabuhi.
