ILOILO CITY-Temporaryo nga ipasirado sang local government sang Tubungan, Iloilo ang busay ukon mas kilala nga “Tubig/Bato Sumpit” sa Barangay Igtuble sa amo nga banwa.
Ini kasunod sang pagkalumos sang isa ka babaye nga naglagaw kaupod sang iya mga abyan sa amo nga lugar.
Sa interview sang Bombo Radyo kay Mayor Roquito Tacsagon, iya ginpahayag nga tun-an nila sang mayo kaupod ang Municipal Tourism Council kag Disaster Risk Reduction and Management Office kun ano ang maayo nga himuon agud malikawan nga masulit ang kaangay nga insidente.
Suno kay Tacsagon, isa sa sa lantawon nila kun tugutan pa ukon dumilian ang pagpaligo sa parte kun sa diin nalumos ang babaye.
Dugang niya, ginalantaw man nga posibilidad ang pag-assign sang lifeguard sa lugar sa tion nga buksan ini liwat sa publiko.
