Liwat nga nagpasalig si Presidente Rodrigo Duterte nga mas pasangkaron sang gobyerno ang mga tikang nga ila ginapatigayon batok sa Coronavirus Disease 2019.
Ini matapos nga ginpirmahan sang presidente ang “Bayanihan to Heal as One Act” nga nagahatag sang mas dako nga gahom sa iya agud solbaron ang krisis sa ikaayong lawas sa pungsod.
Sa idalom sang nasambit nga layi amo ang pagpadasig sang accreditation sang mga testing kits kag gilayon nga pagbulong sa mga pasyente nga apektado sang COVID-19.
Paghatag sang emergency subsidy sa 18 millyon ka mga low income nga pamilya sa pungsod nga nagablor P5,000 tubtob P8,000 kada bulan sa sulod sang duha ka bulan.
Paghatag sang COVID-19 special risk allowance sa mga public health workers magluwas pa sa batunon nila nga hazard pay.
Pagmandu sa PhilHealth nga sabton ang tanan nga medical expenses sang mga public kag private health workers sa tion nga ma expose sa COVID-19 ukon iban pa nga balatian sa tunga sang krisis.
Kag paghatag sang P100,000 sa tanan nga mga health worker nga nagpositibo sa COVID-19 lakip man ang P1,000,000 sa maga taliwan sa tunga sang pandemic.
Ginpasalamatan naman sang Presidente ang kongreso sa paghatag sa iya sang special authority nga makabulig sa pagtapna sang nasambit nga balatian.
Gindayaw man niya ang mga frontliners sa pungsod nga padayon nga naga serbisyo sa pihak sang krisis nga ginapangatubang sang Pilipinas.
