ILOILO CITY- Ginakabig ni Punong Brgy. Roberto Niño sang Calumpang, Molo, Iloilo City bilang dako nga kadungganan ang pagbisita sa iya barangay sang mga katapo sang Barangay Council sang Talamban, Cebu City bilang venue sang ginpatigayon nga benchmarking activity may kaangtanan sa COVID-19 Prevention and Mitigation Response.
Sa interview sang Bombo Radyo kay Punong Brgy. Roberto Niño, iya ginpahayag nga ginpakigbahin sang Brgy. Council sang Calumpang ang mga best practices nga ila napamatud-an nga epektibo ilabi na sang tion nga tuman ang pagtimbuok sang kaso sang COVID-19 sang 2020-2021.
Suno kay Niño, kalakip sa ila nangin tikang sa barangay nga nakabulig gid sa kasagsagan sang pandemya amo ang pagtukod sang Emergency Operation Center kag kag paghanas sa mga contact tracers sang barangay.
Matandaan nga isa ang Calumpang sa mga barangay nga ginpasidunggan sang Iloilo City Government bangud sa dalayawon nga performance sa pagpakig-away batok sa COVID-19 pandemic.
