Ginpaathag sang Bureau of Fisheries and Aquatic Resources ukon BFAR ang importansya sang mangrove, seagrass kag coral reefs bilang mga critical habitat nga nagasuporta sa coastal ecosystem kag sa pagpangisda.
Sa interview sang Bombo Radyo kay Director Remia Aparri sang BFAR 6, iya ginpahayag nga ang tatlo ka critical habitat amo ang ginhalinan sang mga isda kag iban pa nga aquatic animals para magdaku kag magpadayon ang ila populasyon.
Suno kay Aparri, indi lamang ang mga coastal communities ukon mga manug-pangisda ang may responsibilidad sa pagprotekar sang mga ini, kundi tanan nga pumuluyo kag stakeholders.
Pahayag niya, lakip sa mga aktibidad nga nagatuga sa pagkaguba sa mga mangrove, seagrass kag coral reefs, amo ang basura nga ginahaboy sa kadagatan, pag-utod sang mga mangroves, kag irresponsible nga mga fishing activities pareho sang paggamit sang trawl nga makahalit sa coral reefs.
Bangud sini, padayon nga ginapasangkad sang ahensya ang nagkalain-lain nga programa lakip na ang coastal cleanup, mangrove planting, information dissemination kag pag-engage sa mga komunidad kag local government units para maprotektahan ang mga critical habitat.
Dugang pa ni Aparri, importante ang pagpreserbar sang mga nasambit nga coastal and marine ecosystem agud mapadayon ang sustainable fisheries, pangabuhi sang mga manug-pangisda kag food security, amo man ang masiguro nga may magamit pa nga fish resources ang masunod nga henerasyon.
