Padayon nga ginakabig sang Bureau of Fisheries and Aquatic Resources ukon BFAR nga isa ka daku nga challenge ang illegal, unreported and unregulated fishing ukon IUUF sa Western Visayas.
Sa interview sang Bombo Radyo kay Director Remia Aparri sang BFAR 6, iya ginpahayag nga padayon ang koordinasyon kag partnership sang ahensya, mga local government unit kag iban pa nga law enforcement agencies bilang kabahin sang pag-address sa illegal fishing sa rehiyon.
Suno kay Aparri, kabahin man sa ila mga tikang nga ginahimu amo ang pagpatukod sang Bantay Dagat nga gina-capacitate paagi sa training.
Samtang, may yara man sang inter-agency task force nga nagabulig sa pagpatuman sang mga tikang batuk sa nasambit nga mga iligal nga buluhaton sa kadagatan.
Pahayag niya, isa man sa mga pagpanghangkat nga ila ginalantaw amo ang kadam-an sang mga fisherfolk ang nagadepende sa pagpangisda bilang ila nga mga pangabuhihan.
Apang, bangud sa naganubo nga available nga resources kag mga isda sa kadagatan, ang iban nga mga manug-pangisda ang nagasulod sa illegal fishing agud makadamo sang kuha sang isda.
Ginpahayag ni Aparri, indi lamang enforcement ang solusyon sa IUU fishing kundi kinahanglan man ang capacity building, livelihood assistance kag padayon nga engagement sa mga fisherfolk kag komunidad.
Dugang pa niya, kon padayon ang suporta kag pagpakig-angot sang gobyerno sa mga fisherfolk, mas daku ang posibilidad nga magkooperar ang mga ini kag mapauntat ang illegal fishing activities.
