Nagapreparar ang Department of Social Welfare and Development (DSWD) sa posible nga epekto sang El Niño, ilabi na sa mga farmer kag fisherfolk nga posible maapektuhan ang ila nga pangabuhian.
Sa interview sang Bombo Radyo kay Sec Gatchalain, iya ginpahayag nga gina-coordinate sang ahensya ang ila mga tikang sa Department of Agriculture (DA) agud ma-identify ang mga farmer kag fisherfolk nga apektado kag mahatagan sang nagakaigo nga financial assistance.
Suno kay Sec. Gatchalian, kabahin man sang pagpanghanda sang DSWD amo ang Project LAWA at BINHI, nga nagatutok sa food kag water security sang vulnerable communities.
Pagpatpat niya, sa Project LAWA, ginabuligan ang mga komunidad sa mga proyekto para sa water access pareho sang small farm reservoirs kag water facilities, samtang ang project BINHI naman ang nagatutok sa food production pareho sang community gardens kag iban pa nga agricultural activities.
Pagpaathag niya, ini nga mga tikang ang kabahin sang pagpanghanda sang ahensya sa posible nga mas madaku nga epekto sang El Niño, ilabi na sa mga pamilya nga nagasalig sa farming kag fishing para sa ila pangabuhi.
Dugang pa ni Gatchalian, ginpasalig sini ang publiko nga handa ang DSWD nga maghatag sang bulig sa mga pumuluyo nga mahimo maapektuhan sang El Niño kag iban pa nga kalamidad ukon krisis.
